إرشادات بأهم أعطال رينو ميجان وطرق علاجها

#مالگي_رينو_ميجان ٢..

#اهم_اعطال_الكهرباء..

#شرح_تفصيلي_للاعطال

إرشادات بأهم أعطال رينو ميجان وطرق علاجها

اعطال فشل الدوارة بدون رسائل

معظم اعطال فشل الدوارة تندرج تحت بند الاعطال الكهربية

تشغيل المحرك بدون صوت مارش

عند تشغيل المحرك وعدم وجود صوت مارش يصبح العطل فى المقام الأول بطارية ضعيفة وتكون من علاماتها فى بعض الاحيان ضعف فى الإنارة بشكل عام وبعض الأحيان تكون الإنارة تعمل بشكل طبيعي ومع ذلك لا نسمع صوت تكة المارش

العلاج : يتم قياس البطارية وفى حالة ضعفها يتم عمل وصلة خارجية من سيارة اخري وتشغيل المحرك.

السبب الثاني يكون الفيوزات على موجب البطارية ويتم الكشف عليها وتغييرها او عمل كوبري بالسلك بشكل مؤقت لحين تغييرها وتنظيف قواطيش البطارية موجب وسالب. او فيوز المارش في upc .

السبب الثالث الفيوزات العمومية اسفل علبة ال UPC يتم الكشف عليها وتنظيفها أو تغييرها إذا لزم الأمر .

السبب الرابع فشل في توصيل الكهرباء موجب وأرضي الي اوتوماتيك المارش يتم فك الكابل وتنظيفة وإعادة تركيبه مرة أخري.

السبب الخامس عطل فى أوتوماتيك المارش نفسة وبذلك يلزم تغيير المارش لعلاج العطل.

فشل الدوارة مع وجود مارش

يكون من أهم الأسباب لعدم دوران المحرك علي الرغم من دوران المارش هو عطل بحساس الكرنك أو فيشة الحساس ويكون من علامات العطل عدم تحرك عداد ال RPM   مع تشغيل المحرك ويكون العلاج بهز فيشة الحساس مبدئيا وموقعه أسفل كولر تبريد الزيت علي حافة الفتيس وفي حالة عدم الإستجابة يتم فك فيشة الحساس والحساس وفحص الشكل العام والتأكد من عدم وجود أي عوازل أو سوائل داخل الفيشة بسبب الغسيل او تسريب زيت من كولر الزيت اعلاه وتنظيف الفيشة والحساس بأستعمال منظف فيش كهربية كمنظف أكاي AKAY أو كحول أبيض عالي التركيز وتجفيف الفيشة والحساس بالهواء وتركيبها وتجربة المحرك وفي حالة عدم الإستجابة يكون العطل بالحساس نفسه ويلزم تغييره ويفضل إلغاء فيشة الحساس عن طريق لحام السلك مباشرة علي بنات الحساس وعزل المنطقة داخل الحساس بالسيلكون الأحمر الحراري .

السبب الثاني لعدم دوران المحرك هو بعد إستبعاد حساس الكرنك وملاحظة حركة عداد ال RPM  مع التشغيل يكون بسبب فشل وصول البنزين إلي المحرك و يتم التأكد من ذلك عن طريق فك خرطوم البنزين من علي مسطرة الرشاشات بحرص عن طريق مفك رفيع والضغط علي اللوك الأخضر بالمفك ورفع الخرطوم للأعلي والحرص من اندفاع البنزين المضغوط داخل مسطرة الرشاشات ويوضع الخرطوم في زجاجة شفافة ونقوم بفصل أحدى فيش المباين أو الكويلات وتوصيل البنة العليا بموجب البطارية بسلكة خارجية ومراقبة اندفاع البنزين وضغطة واستمراريته وفي حالة عدم وصول بنزين يكون بسبب 

اولا عدم وصول كهرباء لطلمبة البنزين ويكون السبب من فيشة الطلمبة في ال UPC  تراك رقم 5 يتم فحص الفيشة والتأكد من سلامة البنات في الفيشة والبوردة وتنظيفهم بمنظف اكاي مثلا وتركيبها والتجربة وفي حالة وجود أثار أحتراق في البنة يتم عمل كوبري من اسفل البوردة UPC وتوصيلة في السلك بعد الفيشة . 

ثانيا فحص فيشة الطلمبة في الطلمبة نفسها وتنظيفها والتأكد من وصول الكهرباء الي الفيشة وعمل كوبري للفيشة عن طريق ادخال طرف من قطعة سلك خارجية داخل البنة وتركيب الفيشة وتعرية السلك من بعد الفيشة وتوصيل الكوبري وعزل السلك بعازل كهربي شيكرتون.

ثالثا ان يكون العطل في الطلمبة نفسها وبذلك يلزم تغيير قلب الطلمبة أو الطلمبة بالكامل إذا لزم الأمر .

2- أعطال فشل الدوارة مع وجود رسائل 

1- رسالة CARD NOT DETECTED

تكون بسبب عطل في ملف الدوارة داخل الكارت والمسئول عن ارسال كود الشفرة للكمبيوتر يتم فك الكارت وفحص البوردة والملف يكون متصل بالبوردة ب3 أرجل توصيل يكون أحدهم مفصول من علي البوردة ويتم لحامه وفي حالة عدم وجود أرجل مفصولة يكون القطع داخلي داحل الملف نفسه ويكون الحل بتغيير الكارت.

2- رسالة STEERING LOCKED OR STEERING NOT LOCKED

وتكون بسبب عدم وصول إشارة للكمبيوتر بموضع اللوك مقفول أو مفتوح ويتم فحص فيوزات ال UPC فيوز رقم 

5A و 5E و5D وتنظيفهم او تغييرهم إذا لزم الأمر وفحص فيش ال UPC  وال UCH  وتنظيفهم ومعاجة اي بنات يظهر عليها التلف وسوء التوصيل وفي بعض الأحيان يكون العطل من الميكانيزم داخل اللوك نفسه ويتم الطرق عليه بخفه وحرص مع تحريك الطارة للأعلى والأسفل مع تجربة التدوير وفي حالة عدم الأستجابة يتم فك اللوك نفسة ومحاولة تصليح الميكانيزم أو تغيير اللوك إذا لزم الأمر مع مراعاة تركيب شريحة الشفرة القديمة في اللوك الجديد تطابق الشفرة مع الكارت والكمبيوتر.

3- رسالة ELECTRONIC FAULT 

وتكون بسبب سوء توصيل للكهرباء وعلاجها بتنظيف قواطيش البطارية ومراجعة الفيوزات علي البطارية والفيوزات العمومية أسفل ال UPC وفيوزات ال UPC  ومراجعة فيشة مكنة الأستوب وماكينة الأستوب وتغييرها إذا لزم الأمر .

4_ رسالة breaking fault 

من اسبابها نقص مستوي زيت الفرامل او فيشة حساس مستوي زيت الفرامل او مشكلة في نظام ال abs ولازم الكشف بالجهاز  وفيوز الاستوب في المقصورة والمؤشر بتاعه لمبه الاستوب متنورش لما بتدوس فرامل  واخيرا مكنة الاستوب 

5_ رسالة steering fault 

ودي سببها فيوز الباور ستيرنج في الupc او فيشة الاستيرنج في الupc او الفيشة في قطمة الدركسيون واخيرا موتور الاستيرنج في القطمة 

6_ رسالة steering check 

ودي غالبا بتظهر بعد اي شغل في العفشة وبيبقي علاجها تظبيط زوايا ولو مراحتش بيبقي القطمة محتاجه تتبرمج وتتعاير علي الرينو كليب.

7 _ رسالة replace card battary 

ودي بيبقي سببها بطارية الكارت ضعيفه او رقمها مش هو بتاع العربية طيب لو غيرت البطارية وجبت الرقم مظبوط بتاع العربية وبرضه مراحتش بيبقي في مقاومة صغيرة جوه الكارت باظت وبتتغير .

8_ رسالة auto wipers fault 

ودي بيبقي سببها حساس النور والمطر او الضفيره بتاعته . 

3- أعطال إنطفاء المحرك بعد الدوارة 

وتكون بسبب حساس الكرنك وفيشته أو طلمبة البنزين وفيشتها أو حساس الكامة وفيشتة أو حساس الديفيزور وفيشته 

ويتم التعامل معهم بالتنظيف أولا ثم التغيير فى حالة عدم الإستجابة . 

4- اعطال عامة في المحرك بدون رسائل 

1- ضعف في سحب السيارة مع الضغط علي دواسة البنزين ثم إنطلاقها ويكون بسبب حساس الشكمان 

أو اختناق في خط البنزين ويلزم فحص قلب الطلمبة وفلتر البنزين  وفلتر الهوا .وتغييرهم إذا لزم الأمر الكشف علي حساس الكامة ومسطرة الرشاشات واخيرا سير الكاتينة والتأكد من سلامة التوقيت واخيرا ترس الديفيزور .

2- رعشة قى المحرك والمحرك بارد وكأنه سيتوقف ويكون السبب من بوابة الهواء ويجب تنظيفها وإعادة برمجتها وتغييرها إذا لزم الأمر او حساس الهواء (حساس المانيفولد ) ويتم تنضيفة او تغييره أو حساس دواسة البنزين ويتم تنضيفة أو تغييره وممكن البوجيهات والكويلات .

5_ أعطال عامة مع مجود رسائل 

1_ رسالة check injection مع رسالة check gear box

ليس بالضروري اي رسالة check gearbox ان يكون العطل اساسا بالجير بوكس اذا ترادف مع الرسالة رسالة اخري او لمبة abs  يكون السبب من الرسالة المصاحبة او لمبة العطل 

في حالة رسالة check injection 

يجب فحص الكويلات وجودة الشرارة وتكون بفك الكويل ببيبة 10مم ورفع الكويل بعيدا عن شمعه الاحتراق ( البوجيه ) ومراقبة صوت الماكينه لو حدث خلل وبرجله في صوت المحرك بعد رفع الكويل وعودة الصوت للطبيعي بعد توصيله مرة اخري يكون هذا الكويل سليم ويتم التأكد من قوة الشرارة بإدخال مفك داخل الكويل وتقريب المفك من اي جزء ارضي بالمحرك ومراقبة الشرارة للتأكد من قوتها وتكرار هذه العمليه مع الاربع كويلات الي ان يتم تحديد الكويل سبب المشكلة وللعلم قد يكون بسبب اكتر من كويل ويجب تغييرهم 

في حالة عدم وجود كهربا في الاربع كويلات نهائيا يتم الكشف علي فيشة التغذية في ال upcوالتأكد من نضافة البنات وجودة التوصيل .

السبب التاني وده بقي محتاج كشف وقياسات بالأفو ميتر لانه عطل خبيث 

وهو ان الرسالة بتكون check injection مع رسالة check gear box  لكن المباين سليمة وتمام وكهربتها مظبوطة 

بالكشف بنلاقي الكنترول مسجل عطل 

Sensor n°2  voltage supply circuit 

وممكن يكون مسجل معاه بوابة او دواسه بنزين او حساس الهوا او كلهم مع بعض .هنا مش شرط اغير بوابة او دواسه او حساس العطل ينتهي وممكن تغير القطعه الي مسجلة ومع ذلك العطل موجود .

العطل ده بسبب خلل في التغذية لمجموعة حساسات مرتبطين مع بعض لانهم علي خط تغذية واحد من الكنترول ٥ فولت .

دواسة البنزين 

بوابة الهوا 

صمام الكانستر 

حساس ضغط الهوا 

حساس ضغط غاز الفريون 

ولاكتشاف العطل لابد من الكشف والمراجعة علي فيش الخمس قطع وقياس البنات بالأفو مع فيشه الكنترول والبنات مع بعضها للتأكد من عدم وجود شورت كهربي والتأكد من سلامه الضفيره الكهربية 

ممكن العطل يبقي في قطعه واحده منهم او في الفيشه بتاعتها او في الضفيره نفسها .

2_ رسالة check gear box مع لمبة abs

يجب الكشف بالجهاز لتحديد الحساس اللي فاصل اشارة او في عدم توافر جهاز كشف يجب مراجعه الاربع حساسات والبدء بالحساسات الامامية لأن غالبا ما يكون بسبب انه اتهز من مكانه بسبب مطب او بسبب اتساخ من تسريب شحم من كاوتش الكوبلن فيجب تنضيفه ومعالجه التسريب بتغيير الكاوتشه إن ووجد .وتثبيت الحساس بشكل جيد ومراجعه سلك الحساس لغايه الفيشة والتأكد من عدم وجود قطع في السلك .

3_ رسالة check gear box منفردة 

يتم الكشف بالجهاز لتحديد اذا كان مسجل اي حساسات ومراجعة ضغوط الفتيس في حالة التعشيق وعدم التعشيق ومراجعة ضغوط السولونويد 

في معظم الاحوال بيكون مسجل 

Pressure regulation

ودي غالبا بتكون من حساس الضغط اسفل الفتيس ويجب مراجعة الضغط وسلك الحساس من راس الحساس وحتي الفيشة في فيشة المجمع في الفتيس والتأكد من عدم وجود اي سلك عاري وملمس طيب لو السلك سليم والضغط سليم بيكون العطل من السولونويد ويجب التأكد من ضغط الفتيس بعد السولونويد ويتم تغييره في حاله التأكد ان العطل منه .

Auto transmetion enternal pressure

ودي بتكون بسبب نقص في مستوي زيت الفتيس .

Analog sensor feed

ودي برضه بتكون بسبب سلك عاري من حساس الضغط او ضعف فولتيه الواصله من فيشة التغذية بال upc 

4_ رسالة gear box over heating 

ودي معناها ان حرارة زيت الفتيس تعدت درجة الحرارة المسموحة للتشغيل والطبيعية والسبب غالبا بيكون سدد في دورة تبريد المحرك عامة وكولر الفتيس خصوصا والعلاج مراجعة دورة التبريد وتسليكها وتنضيف كولر الفتيس بشكل خاص او تغييره في حاله انسداده بشكل كامل وفشل عملية التنضيف.

بعد كل ده لو العطل مازال قائم بيكون السبب حساس حرارة زيت الفتيس وده بيتم تغيير ضفيرة البدي فالف داخل الفتيس .

يجب في جميع حالات check gear box او gear box over heating مراجعة مستوي زيت الفتيس ولزوجته ولونه ونضافته وخلوه من الرواسب والرايش 

طريقة قياس زيت فتيس الميجان او فتيس dpo

يتم تسخين زيت الفتيس الي درجة حرارة 60° ورفع السيارة علي تحميلتين من الامام بشكل مستوي وتشغيل المحرك ووضع الفتيس علي وضع park  وفك الطبة المعدنية حتي ينزل الزيت بشكل سرسوب واول ما يبدء ينقط اقفل الطبة وكده المقاس مظبوط  طيب لو مجابش سرسوب ونقط علي طول يبقي ساعتها الزيت ناقص هتقفل الطبة وتطفي المحرك وتزود 1/2 لتر زيت وتعيد التجربة وتزود تاني لو احتجت .

طيب لو في هبده في الغيار لو العربية سخنه او مشوار طويل وهديت وبتحاول تتحرك والغيار اتأخر والفتيس هبد معاك ده غالبا بيكون طقم شنبر ديل الفتيس حصل فيه تآكل ومحتاج يتغير .

5_ رسالة engine over heating 

ودي معناها حرارة المحرك عالية ودي للآسف ليها اكتر من سبب ولازم يتراجعوا كلهم اولا ممكن يكون سدد في دورة التبريد ودي لازم تفك الراديتير ويتسيخ مش يتضرب بميه بس لاء لازم يتفك العلبة الجانبية ويتسيخ مواسيره من الداخل 

التأكد من المروحة بسرعتينها اولي وتانيه وكفاءة سرعة المروحة ممكن المروحة تبقي شغالة سرعتين بس السرعة التانية بقت ضعيفة ومش بالكفاءة المطلوبة هنا يلزم تغيير المروحة 

طيب المروحة مش شغالة اصلا 

اولا فيوز المروحة في ال upc وبعدها فيشة المروحة في ال upc وبعدها فيوز المروحة في الفيوزات العمومية اسفل الupc 

طيب راجعت كل ده ومفيش مشكله وبرضه مش شغاله 

ليه مخلصناش في مقاومة المروحة في قميص المروحة تتراجع وفيشة المقاومة وفيشة المروحة ممكن تكون الفيشة نفسها عامله bad conect بسبب اكسده او انها مش لمسه كويس او وسعت البنات بتاعتها 

طيب المروحة شغالة بس سرعة اولي بس والسرعة التانية مبتشتغلش 

هنا بقي في كتاوت سرعة تانية اسفل ال upc في ميجان فيز 1 هنراجع علي الكتاوت والقاعدة وجودة التوصيل في بنات القاعدة وتغيير الكتاوت 

طيب وفيز 2 الكتاوت بتاعها موجود داخل الupc نفسه وده ملكش فيه ده هتفك الupcويروح يتصلح او تغيره كله 

في ايه تاني يسخن بس الاسباب دي 

لا استني لسه فيه طلمبة المية ممكن تكون ضعيفة وتسبب ضعف دورة التبريد ودي يكشف عليها متخصص 

وفي كمان قربة الميه ممكن تسخن العربية او مش محكمة الغلق بسبب تآكل جوان او سيل الغطا الداخلي وده هيسبب ان دايرة التبريد تاخد هوا وده يسخن المحرك لان دورة التبريد مغلقة وممكن الغطا سليم والقربة نفسها فيها شرخ او ثقب بيسبب نفس الكلام 

خلاص كده لسه بقي التقيل اوي والعطل الخفي 

حساس الحرارة نفسه ممكن يخرف ويبعت اشارة للكنترول بإن الحرارة طبيعية وكله تمام فالكنترول ميشغلش المروحة وده ممكن بسببين ان مكان حساس الحرارة فيه هوا او ان الحساس نفسه بايظ 

وساعات العكس ممكن الحساس يدي قراية ان المحرك سخن وفي الحقيقة مفيش حرارة والامبير معلم معاك حرارة وهمي 

وده بقي اكتشافه محتاج متخصص 

ثرموستات الحرارة من اكتر اسباب ارتفاع حرارة المحرك لانه بيعلق دايما في وضع القفل الكامل او نص قفلة وفي الحالتين بيكون سبب في خلل دورة التبريد وده بيكون العلاج بالغاؤه او تغييره .

واخر حاجه بقي هي سدد في فتحات التبريد في وش السلندر ودي بسبب تكون الرواسب والصدأ علي مر السنوات وقفل الفتحات تماما والتسبب في تآكل في معدن وش السلندر وممكن يؤدي الي دخول المياه الي غرف الاحتراق .

أعطال بدون رسائل 

1_ العربية مش عاوزة تدور والغيارات مش معلمه علي الشاشة 

غالبا الفيشة الرصاصي في ال upcبيتراجع عليها ونضافتها وجودة التوصيل 

وبعد كده بيكون سيليكتور او سويتش النقلات برضه بيتفك ويتنضف الاول بمنظف الكترونيات جاف ويتغير في حالة عدم الاستجابة وممكن فيشه كنترول الفتيس او الكنترول نفسه .

2_ العربية مبرجله وتحس انها متلته لكن مفيش رسايل وجربت الكويلات والبوجيهات وتمام  دي غالبا بالكشف بتكون مسجله حساس تكييف لو فصلت الفيشة والمحرك انتظم غير الحساس او راجع علي ضفيره الحساس الاول . 

واخيرا الرينو الميجان او الرينو بشكل عام عربية فيها تكنولوجيا عالية جدا وبتعتمد علي الكهربا بشكل اساسي فلازم احافظ علي الكهربا وانضف دايما قواطيش البطاريه واي خلل اقابله في اي قطعه كهربيه متكسلش ولازم تعالج الخلل لانه بيأثر علي باقي المكونات وهيسبب اعطال تانيه 

والبطاريه لو بقت ضعيفه تتغير ومتستناش عليها . 

طبعا انا مقدرتش اذكر كل الأعطال لكن اغلبها..

تحياتي.